Page 75 - Dodtalschodn Flipbook
P. 75
De SeHNSuCHD iS A
gLANeS BöziCHS NOgeDiA 13
De Sehnsuchd is a glanes bözichs Nogedia, wos in dia umadumhuschd so wias wü.
Wauns nogn duad in dia, kenndtasd brühn vua Schmeadsn
und waunns a Ruah gibd, wiads drin in dia dodnschdüh.
Maunchmoi duads di ned mea eis gaunds zoad schdreichln,
mid ian Schwaaf, so buschich und fedaleichd.
Maunchmoi gschbiasdas nua gaunds vuasichdich knabban
und waunns duad an Seifdsa, wean deine Augn feichd.
De Brusd kaunns da zuschnian in a boa Sekundn.
Es Heads kaunns da mochn schwaa eis wia an Schdaa.
In Hois, do kaunns da a dickes Knedl schdobfn.
Und waunns damid feadich is, lossds di allaa.
De Sehnsuchd waaß ofd goa ned, wos suachn soi.
Daunn beissds ois au und schbuckd ois wieda aus.
Und waunns waaß, wos wü, daunn wiadsas niemois findn
und schbühd ewich laung mid si söwa Kods und Maus.
Du waaßd nie, obs ned glei wieda griagd an Hunga,
weu sodt weadn, des kaunn de Sehnsuchd ned.
Waunns wos zum Fressn brauchd, daunn faungds au ins Rasn
und nogd und nogd und du rodiasd de gaundse Nochd in Bedt.
Maunchmoi dengsd da, vülleichd wü des Viech afoch ausse.
Du lossasdas scho geh, waunnsd nua wissasd wia.
Oba du glaubsd ned drau und waaßd genau, es wiad da drei bleibn,
dei liabes, glanes, bözichs Nogedia…
73
